ಮೂಲಶ್ಲೋಕ-ಪ್ರಥಮೋಽಧ್ಯಾಯಃ
॥ ಓ̐ ॥
ಬ್ರಹ್ಮವಾದಿನೋ ವದನ್ತಿ । ಕಿಂ ಕಾರಣಂ ಬ್ರಹ್ಮ ಕುತಃ ಸ್ಮ ಜಾತಾ
ಜೀವಾಮ ಕೇನ ಕ್ವ ಚ ಸಂಪ್ರತಿಷ್ಠಾಃ।
ಅಧಿಷ್ಠಿತಾಃ ಕೇನ ಸುಖೇತರೇಷು ವರ್ತ್ತಾಮಹೇ ಬ್ರಹ್ಮವಿದೋ
ವ್ಯವಸ್ಥಾಮ್ ॥ ೦೧.೦೧ ॥
ಕಾಲಃ
ಸ್ವಭಾವೋ ನಿಯತಿರ್ಯ್ಯದೃಚ್ಛಾ ಭೂತಾನಿ ಯೋನಿಃ ಪುರುಷೇತಿ ಚಿನ್ತ್ಯಾ ।
ಸಂಯೋಗ
ಏಷಾಂ ನ ತ್ವಾತ್ಮಭಾವಾತ್ ಆತ್ಮಾಪ್ಯನೀಶಃ ಸುಖದುಃಖಹೇತೋಃ ॥೦೧.೦೨॥
ತೇ
ಧ್ಯಾನಯೋಗಾನುಗತಾ ಅಪಶ್ಯನ್ ದೇವಾತ್ಮಶಕ್ತಿಂ ಸ್ವಗುಣೈರ್ನ್ನಿಗೂಢಾಮ್ ।
ಯಃ
ಕಾರಣಾನಿ ನಿಖಿಲಾನಿ ತಾನಿ ಕಾಲಾತ್ಮಯುಕ್ತಾನ್ಯಧಿತಿಷ್ಠತ್ಯೇಕಃ ॥ ೧.೩ ॥
ತಮೇಕನೇಮಿಂ ತ್ರಿವೃತಂ ಷೋಡಶಾನ್ತಂ ಶತಾರ್ದ್ಧಾರಂ ವಿಂಶತಿಪ್ರತ್ಯರಾಭಿಃ ।
ಅಷ್ಟಕೈಃ ಷಡ್ಭಿರ್ವಿಶ್ವರೂಪೈಕಪಾಶಂ ತ್ರಿಮಾರ್ಗ್ಗಭೇದಂ ದ್ವಿನಿಮಿತ್ತೈಕಮೋಹಮ್ ॥೦೧-೦೪ ॥
ಪಞ್ಚ ಸ್ರೋತೋಽಮ್ಬುಂ ಪಞ್ಚಯೋನ್ಯುಗ್ರವಕ್ರಾಂ
ಪಞ್ಚಪ್ರಾಣೋರ್ಮ್ಮಿಂ ಪಞ್ಚಬುದ್ಧ್ಯಾದಿಮೂಲಾಮ್ । ಪಞ್ಚಾವರ್ತ್ತಾಂ
ಪಞ್ಚದುಃಖೌಘವೇಗಾಂ ಪಞ್ಚಾಶದ್ಭೇದಾಂ ಪಞ್ಚಪರ್ವ್ವಾಮಧೀಮಃ ॥೦೧-೦೫॥
ಸರ್ವಾಜೀವೇ ಸರ್ವಸಮ್ಸ್ಥೇ ಬೃಹನ್ತೇ ಅಸ್ಮಿನ್ ಹಮ್ಸೋ ಭ್ರಾಮ್ಯತೇ ಬ್ರಹ್ಮಚಕ್ರೇ ।
ಪೃಥಗಾತ್ಮಾನಂ ಪ್ರೇರಿತಾರಂ ಚ ಮತ್ವಾ ಜುಷ್ಟಸ್ತತಸ್ತೇನಾಮೃತತ್ವಮೇತಿ ॥೦೧-೦೬॥
ಉದ್ಗೀತಮೇತತ್ಪರಮಂ ತು ಬ್ರಹ್ಮ ತಸ್ಮಿಂಸ್ತ್ರಯಂ
ಸುಪ್ರತಿಷ್ಠಾಽಕ್ಷರಂ ಚ ।
ಅತ್ರಾಂತರಂ ಬ್ರಹ್ಮವಿದೋ ವಿದಿತ್ವಾ ಲೀನಾ ಬ್ರಹ್ಮಣಿ ತತ್ಪರಾ
ಯೋನಿಮುಕ್ತಾಃ ॥೦೧-೦೭॥
ಸಂಯುಕ್ತಮೇತತ್ ಕ್ಷರಮಕ್ಷರಂ ಚ ವ್ಯಕ್ತಾವ್ಯಕ್ತಂ ಭರತೇ
ವಿಶ್ವಮೀಶಃ ।
ಅನೀಶಶ್ಚಾತ್ಮಾ ಬಧ್ಯತೇ ಭೋಕ್ತೃಭಾವಾಜ್ ಜ್ಞಾತ್ವಾ ದೇವಂ ಮುಚ್ಯತೇ ಸರ್ವಪಾಶೈಃ ॥೦೧-೦೮॥
ಜ್ಞಾಜ್ಞೌ ದ್ವಾವಜಾವೀಶನೀಶಾವಜಾ ಹ್ಯೇಕಾ ಭೋಕ್ತೃಭೋಗ್ಯಾರ್ತ್ಥಯುಕ್ತಾ
।
ಅನನ್ತಶ್ಚಾತ್ಮಾ ವಿಶ್ವರೂಪೋ ಹ್ಯಕರ್ತ್ತಾ ತ್ರಯಂ ಯದಾ ವಿನ್ದತೇ
ಬ್ರಹ್ಮಮೇತತ್ ॥೦೧-೦೯॥
ಕ್ಷರಂ ಪ್ರಧಾನಮಮೃತಾಕ್ಷರಂ ಹರಃ ಕ್ಷರಾತ್ಮಾನಾವೀಶತೇ ದೇವ ಏಕಃ ।
ತಸ್ಯಾಭಿಧ್ಯಾನಾದ್ಯೋಜನಾತ್ತತ್ತ್ವಭಾವಾದ್
ಭೂಯಶ್ಚಾಂತೇ ವಿಶ್ವಮಾಯಾನಿವೃತ್ತಿಃ ॥೦೧-೧೦॥
ಜ್ಞಾತ್ವಾ
ದೇವಂ ಸರ್ವಪಾಶಾಪಹಾನಿಃ ಕ್ಷೀಣೈಃ ಕ್ಲೇಶೈರ್ಜ್ಜನ್ಮಮೃತ್ಯುಪ್ರಹಾಣಿಃ
।
ತಸ್ಯಾಭಿಧ್ಯಾನಾತ್ತೃತೀಯಂ
ದೇಹಭೇದೇ ವಿಶ್ವೈಶ್ವರ್ಯ್ಯಂ ಕೇವಲ ಆಪ್ತಕಾಮಃ ॥೧.೧೧ ॥
ಏತಜ್ಜ್ಞೇಯಂ
ನಿತ್ಯಮೇವಾತ್ಮಸಂಸ್ಥಂ ನಾತಃ ಪರಂ ವೇದಿತವ್ಯಂ ಹಿ ಕಿಂಚಿತ್ ।
ಭೋಕ್ತಾ
ಭೋಗ್ಯಂ ಪ್ರೇರಿತಾರಂ ಚ ಮತ್ವಾ ಸರ್ವಂ ಪ್ರೋಕ್ತಂ ತ್ರಿವಿಧಂ ಬ್ರಹ್ಮಮೇತತ್ ॥೧.೧೨ ॥
ವಹ್ನೇರ್ಯ್ಯಥಾ
ಯೋನಿಗತಸ್ಯ ಮೂರ್ತ್ತಿರ್ನ್ನ ದೃಶ್ಯತೇ ನೈವ ಚ ಲಿಞ್ಗನಾಶಃ ।
ಸ
ಭೂಯ ಏವೇನ್ಧನಯೋನಿಗೃಹ್ಯಸ್ತದ್ವೋಭಯಂ ವೈ ಪ್ರಣವೇನ ದೇಹೇ ॥೧.೧೩ ॥
ಸ್ವದೇಹಮರಣಿಂ[1]
ಕೃತ್ವಾ ಪ್ರಣವಂ ಚೋತ್ತರಾರಣಿಮ್ ।
ಧ್ಯಾನನಿರ್ಮ್ಮಥನಾಭ್ಯಾಸಾದ್
ದೇವಂ ಪಶ್ಯೇನ್ನಿಗೂಢವತ್ ॥೧.೧೪ ॥
ತಿಲೇಷು
ತೈಲಂ ದಧನೀವ ಸರ್ಪ್ಪಿರಾಪಃ ಸ್ರೋತಃಸ್ವರಣೀಷು ಚಾಗ್ನಿಃ ।
ಏವಮಾತ್ಮಾಽಽತ್ಮನಿ
ಗೃಹ್ಯತೇಽಸೌ ಸತ್ಯೇನೈನಂ ತಪಸಾಯೋಽನುಪಶ್ಯತಿ ॥೧.೧೫ ॥
ಸರ್ವವ್ಯಾಪಿನಮಾತ್ಮಾನಂ
ಕ್ಷೀರೇ ಸರ್ಪ್ಪಿರಿವಾರ್ಪ್ಪಿತಮ್ ।
ಆತ್ಮವಿದ್ಯಾತಪೋಮೂಲಂ
ತದ್ಬ್ರಹ್ಮೋಪನಿಷತ್ ಪರಂ ತದ್ಬ್ರಹ್ಮೋಪನಿಷತ್ ಪರಂ ಇತಿ ॥೧.೧೬ ॥
******************
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ